ASHA

ASHA (Accredited Social Health Activist)

Thil tum:   Nu leh nausen thi zat (Maternal Mortality Rate & Infant Mortality rate) tih tlem

ASHA te hi National Health Mission (NHM) programme peng zing a pakhat Community Process hnuai a lak an ni a. Khawtlang mipuite leh health department te inkar a awm, an aiawh anih ve ve avangin mipuite leh health department dawh zawmtu lei (bridge) tiin an sawi thin. Village Council/ Local Council awmna ah an population a zirin pakhat emaw a aia tam pawh an awm thei a,tunah hian Aizawl East District hnuaiah hian Health Ministry in a hriatpui ASHA 169 leh anmahni bialtu ASHA Mobilizer (Facilitator) 13 leh District a anmahni enkawltu District ASHA Coordinator 1 an awm mek a ni.

Nausen leh nu raicheh a thi tihtlem hi a thiltum lian ber ni mah se ASHA chuan khawtlang hriselna tur a hmalakna kawng hrang hrang buaipuitu programme dang Vector Borne Disease Control Programme (Malaria, Dengue, etc.), NCD, TB, Leprosy, IDSP, IDD, AYUSH, Health and Wellness, etc. te hmalakna ah grass root level a tihhlawhtlinna ah hmun pawimawh tak a chang thin. Chumi tur atan chuan hriselna kawng a hmalakna hrang hrang tihlawhtling turin home visit te a nei thin a, Health worker te leh Anganwadi Worker te nen thawk hovin Sub Centre, damdawiin, Anganwadi Centre ah te nu leh nausen/naupangte a hruai thin a, Village Health and Nutrition day ah telin thusawina hun te pawh a hmang thin. Khawtlang hriselna leh thianghlimna kawng a hmalatu pawl Village/local Council member hmeichhia in a kaihhruai Village Health Sanitation and Nutrition Committee (VHSNC) ah secretary leh sum vawngtu a ni a. Thlatin he committee hian khawtlang hriselna kawng a hmalak dan tur sawiho turin meeting neiin chu chu a bawhzui bawk thin. Hrileng a awm te, mitthi an awm te pawhin ASHA chu hma la hmasa tu te zing ami niin a tul angin health worker leh bialtu doctor te hmalakna ah a pui thin. 

ASHA HNATHAWHTE:

1.   NU LEH NAUTE HRISELNA:

ASHA chuan a bial chhung a nupa, fa la nei thei (Eligible couple) te atanga bultan in, nu chuan nau a pai tantirh atangin an veng bialtu Sub centre/ Clinic a ANC (Ante Natal Care) a dawn kim theih nan a pui a, chumi chhung a a mamawh  tur chaw tha (nutrition) a dawn theih nan Village Health and Nutrition Day (VHND) , Anganwadi Centre a neih thin ah te kal turin a fuih a. Amah pawh chuan telpuiin hun te pawh a hmang thin. (Health Department pawn lam programme ICDS hnuai a mi te nen pawh thawhhona tha tak an nei)  Nu chuan nau a neih hnu ah sawrkar damdawiin emaw private damdawiin pawh ni se damdawiin/ Sub centre nauneih theihna hmun a naunei turin a fuih a, a hruai bawk thin. Damdawiin a naunei leh inlam a naunei te chu Home based newborn care (HBNC) leh Home based care for young child (HBYC) hmang in a enkawl chhunzawm a. Chutiang home visit ah te chuan in lam a enkawlna tha nu leh naute in an dawn theih nan a tul angin a pui a, hnute pek dan tur dik atangin nausen/ naupang damlohna lak a inven dan tur te, an damloh pawh a in lam a inenkawl dan tur te a zirtir thin a. Tin, nu leh naute  tan a dinhmun hlauhthawnawm te hrilhfiah in chutiang hun a an awm dan tur leh tihdan tur te a zirtir bawk thin. Hetiang a an tih theih na tur hian ASHA te hi training pek thin an ni. 

Nu leh naute tan a Sub centre a vaccine lak tur te an lak kim theih nan a pui thin a. Nu leh a fa chu an lo hrisel zawk nan nu mamawh milin indanna leh insiamna chungchang a kawhhmuh bawk thin.

2.   KHAWTLANG HRISELNA LAMA ASHA HNATHAWHTE :

                ASHA chuan natna chi hrang hrang lak a inven dan tur te leh tlang hrileng a awm pawh a inlam a in enkawl  theih dan tur te chu Home visit kaltlang leh khawtlang mipui tam zawk huap theihna tur in vantlang inkhawmah te leh Nutrition Day (VHND) ah te a zirtir thin a. Vengchhung/ khawchhung a damlo, khawsik an awm in ASHA chuan a natna chu malaria vang a nih leh nih loh hriat nan thisen a test sak thei bawk. 

Tin, khawchhung/ vengchhung a mitthi an awm in eng vang pawh a a thi ni se, Sub centre a report pe hmasa ber  tu (1^st informant) tur a ngaih leh beisei a ni. (Hetia thihna thlen chhan atang a thil hmuh chhuah te atang hian chutiang avang a thihna lo thleng chhunzawm zel tur lak a a theih ang a inven nan a tul angin health department in hma a la thin)

ASHA chu khawtlang hriselna atan a hmalatu pawl, VHSNC (Viilage Health Sanitation and Nutrition Committee) ah  secretary leh sum vawngtu niin he pawl ah hian khawtlang/ veng chhung a mi pawimawh local / village council hruaitu thenkhat te, NGO pawl hrang hrang a comt member aiawh te, department dang aiawh (zirtirtu, PHE, IDCS, PWD, education, etc.) leh ASHA mobilizer te nen an awm a ni.  He pawl hian khawtlang hriselna kaihhnawih ho chu thlatin meeting a sawi hovin a tul angin hma an la thin. Vengchhungin khawtlang ang a hriselna lam kawng a harsatna an neih te pawh chu VHSNC ah chuan thlenin VHSNC chuan khawtlang aiawhin a tul angin hma a la thei bawk.